ஆச்சிக்கு அகவை 91- வாழ்த்து!

என்னருமை நண்ப ரென;

இணையற்ற மனித ரென;
தென்னகத்தின் தென் பகுதித்
திருநெல்லைப்  ‘பிள்ளை’யெனப்
பொன்மனத்தைப் பூத்தி ருக்கும்
பிரேமநா யகத் தின்தன்
அன்னை எனத் திகழும்
அன்னைக்கு வாழ்த் துரைத்தேன்!

அகம் தேடி வந்தார்க்கு
அகம்நிறைய விருந்தளிக்கும்
சுகம்கூட சைவத் தின்
சுவைகூட்டும் கொள்கை’யென
முகம் சுளிக்கா தின்றைக்கும்
முதுமைதனை வெல்லுகின்றார்;
தகைசான்ற பண்பாட்டின்
தருமநெறி சொல்லுகின்றார்!

சைவத் திருநெறி யின்பால்
சலிப்பில்லாக்  கடமை யுடன்
வையத் திருந் தின்று
வளையாமல் நிமிர் கின்றார்;
ஐயம் தவிர்த் தன்பில்
அனைவர்க்கும் தாய் என்று
உய்கின்ற ஆச்சி இவர்;
ஒரு குறையும் வாராது!

பன்னிரண்டு பிள்ளைகளைப்
படைத்த தொரு தாயாக;
முன்பிருந்த வாழ்க்கை யதன்
முறைமைகளை மாற் றாது;
நன்னெறிகள் அத் தனையும்
நாள்தோறும் செழித்திருக்க,
தன்னுடைய கொள்கையதில்
தளராத  பெரு மாட்டி!

‘பாப்பம்மாள்’ எனும்,இந்தப்
பாட்டிக்கு வாழ்த்துரைக்க,
மூப்பில்லை என்ற னுக்கு;
முறையல்ல;என் றாலும்
‘காப்புரிமை பெற்ற ஒரு
கவிஞன்’ என வாழ்த்து வது
கேட்பவர்க்கும் உணர்பவர்க்கும்
கிட்டாத பெரும் பேறு!

திருநீறு எப்போதும்
தீட்டுகின்ற இவர் நெற்றி;
ஒருநாளும் தவ றாது
உரைக்கின்ற சிவ பக்தி;
மருவற்ற மன தோடு
மற்றவர்க்குச் சுமையின்றி
தரவாகத் தன் கடனைத்
தானேதான் செய் கின்றார்!

குறும்பான சிந்தனைகள்;
குலையாத நினைவலைகள்;
எறும்பான சுறு சுறுப்பு
எப்போதும் நல் நினைப்பு;
கரும்பான அன்பு மொழி;
கலகலக்கும் நகைச் சுவைகள்;
இரும்பான மன உறுதி;
இவரொத்த பெண்க ளிலை!

‘ஆச்சி’ என்ற ழைத்து,
அனைவருமே மதிக் கின்ற
பேச்சில் புன்ன கைத்து
பிழையில்லாப் பேரன்பை
மூச்சில் கொண்டி லங்கும்
மூதாட்டி,பாப்பம் மாள்;
ஆட்சிதான் இவர்வீட்டில்
அனைவர்க்கும் இவர் ‘ அம்மா!’

தொண்ணூற்று ஓராண்டைத்
தொல்லையின்றிக் கடந் திங்கு;
நன்நூற்றைக் காண் பதற்கு;
நடைபோடும் ஆச்சிக்கு
நன் ஊற்றுக் கவி ஊற
நாவாலும் மன தாலும்
பொன்னூற்று வாழ்த் தாக்கிப்
பூரித்தேன்,இந் நாளே!

மகிழ்வோடும் நெகிழ்வோடும்-
கிருஷ்ணன்பாலா 
10.10.2013

குறிப்பு:

எனது இனிய நண்பர் ‘ஆடிட்டர்’ திரு.பிரேம நாயகம் அவர்களின் தாயாரும் அனைவராலும் ‘ஆச்சி’ என்று அழைக்கப்படுபவருமான ‘சிவநெறி’த் திருமதி. பாப்பம்மாள் அவர்கள் 91ஆம் அகவையை முடித்து, அகவை 92ல் அடியெடுத்து வைத்த இந்நாளில் ஆச்சிக்காகப் படைக்கக் பெற்ற கவிதை இது.

அறிஞர் அண்ணாத்துரை!

அறிஞர் அண்ணாதுரை-

மெத்தப் படித்தறிந்த மேதைமையைக் கொண்டவர்தான்;
சொத்துச் சேர்க்காமல் சுவர்க்கத்தைக் கண்டுவிட்டார்!
’அண்ணா’ எனச் சொன்னாலே என்மனது அப்போது
அண்ணாந்து பார்த்து, ஆர்ப்பாட்டம் கொண்டிருக்கும்!

வெள்ளை மனதோடு வெளுத்ததெலாம் ’பால்’ என்று
கொள்ளையர்கள் பலரைக் கூட்டமெனக் கொண்டிருந்தார்;
பிள்ளை வயதில்எனைப் பிடித்திட்டப் பித்தம்போல்
கொள்ளை கொண்ட இப்பெயரை இப்போது நினைக்கின்றேன்:

ஊழல்செயத் தெரியாமல் உட்கார்ந்தார் ஆட்சியதில்;
வாழத் தெரியாமல் வசப்பட்டார் ஆட்சிக் கட்டில்;
ஈழப்பிரச்சினையும் அப்போது வாராமல்
சூழ்நிலையால் நோய் கண்டு சொர்க்கத்தைச் சென்றடைந்தார்.

‘அண்ணன் எப்போது அமரநிலை ஆவாரோ?
திண்ணை எப்போது நம் வசத்தில்  சேருவதோ?”
என்று அவர் தம்பி ஏங்கித் தவம் இருக்கக்
கொன்றானே காலனவன்,கலைஞருடன் கைகோர்த்து!

அரசுப் பணத்தோடு அரியாசனத்தைத் தன்
உரிமைப் பொருளாக்கி ஊழலுக்குப் புது வடிவம்
முரசொலித்துத் திசையெட்டும் முளைத்தோங்கக் காட்டி
அரச வம்சமென ஆகிவிட்டார் இவர் தம்பி!

தமிழரெலாம் தலைகுனிய;தன்மானம் சாக் கடையில்;
தமிழ்நாட்டுப் பண்பாடு தாங்கவொணாச் சவக் குழியில்;
எப்போதும் சுயநலத்தில்;எழுதுவதோ பொது நலத்தை;
இப்போது நினைத்தாலும் எங்களுக்குத் தூக்கமிலை!

எத்தகைய விமர்சனமும் இவர்களுக்கு இனித்திருக்க;
முத்தமிழின் வித்தகராய் முடிசூட்டும் முட்டாள்கள்;
உத்தமன் போல் பேசி  உளறுகின்ற வார்த்தைகளின்
வித்தையிலே ஏமாந்து வீழ்ந்ததிந்தத் தமிழரினம்!

நாடு காடாக;நரிகளெலாம் நாட்டாமை;
கேடு சூழ்ந்ததொரு கேனக் கிறுக்க ரென
சாடிச் சினம் தீர்க்கத்தா னிந்தத் தமிழரினம்;
வேடிக்கை பார்ப்போமோ? வேதனைதான் கொள்வோமோ?

இப்படியோர் இழிந்தநிலை இந்நாடு கண்டிருக்க
இப்படியோர் உடன் பிறப்பை இழுத்து விட்ட அண்ணாவை
எப்படித்தான் எண்ணுவதோ? ஏமாந்த சோணகிரி,
எப்படித்தான் ‘அறிஞர்’ என ஆனாரோ; நாணுகிறேன்!

ஆனாலும் அண்ணாவை; தமிழ் தந்த  அவர் நாவை;
தேனாகக் காண்கின்றேன்; தி.மு.க எனும் போது
தீயாகக் காண்கின்றேன்;  திராவிடத்துப் பொய்யர்களைப்
பேயாக வளர்த்துவிட்ட  அண்ணாவால், நாணுகிறேன்!

இவண்-
கிருஷ்ணன்பாலா
15.9.2013

செழுந்தமிழ் நட்பு!

கவிதையெனும் பெயரிலிங்கு கண்டபடி

கருத்துக்கள் எழுதுகின்றார் சிலபேர்கள்;
கவிதை என்றால் என்னவென்று அறிந்திடாத
கடைகெட்ட மூடர் அதை ரசிக்கின்றார்கள்!

பெண் என்ற பெயராலே எழுதிவிட்டால்
பேயாக ரசிப்பது போல் கருத்துச் சொல்லி
கண் என்றும் உயிர் என்றும் கசிந்துருகி
கருத்துக்கள் சொல்லி,அதை ருசிக்கின்றார்கள்.

மூடர்கள், முட்டாள்கள், தமிழ் மொழியின்
முடவர்கள், குருடர்கள், செவிடு கொண்ட
கேடர்கள் அவரைநாம்நாம் என்ன சொல்ல?
கிறுக்கர்கள்தாம் அவரை மன்னிப்போமா?

நல்ல தமிழ் எதுவென்று அறிந்ததில்லை;
நயமான கற்பனைகள் கொண்டதில்லை;
சொல்ல வரும் கருத்தில் ஓர் புதுமையில்லை;
சுவையாக எழுதிடவும் பழக்கமில்லை!

முகநூலில் வீண் உரைகள் புனைகின்றார்கள்;
முக்காட்டுக் குள்ளிருந்து முனகுகின்றார்;
தகவின்றித் தமிழ் நடையின் சிறப்பை யெல்லாம் 
தகர்ந்த்தெறிந்து தத்துவங்கள் பேசுகின்றார்!

ஆனாலும் அவர் பின்னே ஓடுகின்ற
அறிவிலிகள் கூட்டம்தான் அதிகம் இங்கு;
நானாக அவர்கருத்தில் சென்று அங்கு
நம்கருத்தை எழுதுவதால் பயனே இல்லை!

அறிந்திடுவீர்; என் குணத்தை எனக்கு என்று
இறுமாப்பு மிகவுண்டு;தமிழை இங்கு
குறைப்படுத்தி எவரேனும்எழுதி என்முன்
குலவுகின்ற மூடமைக்கு இடமேஇல்லை!

குறிப்பாகக், கவிதை என்று எனது பக்கம்
கூறுதற்கு முனையாதீர்;முனைவீர் என்றால்
செறிவான எழுத்தோடு என்முன் வாரீர்
செழுந்தமிழைச் சேவித்து நட்புக் கொள்வோம்!

இவண்-
கிருஷ்ணன்பாலா
27.12.2011

என்னைவிட்டு ஓடிப்போக முடியுமா?

'வா’ வென்று ஆவலோடு
வரவேற்று நட்பை எலாம்
‘தா’  வென்று யாரிடத்தும்
தயவு செயக் கேட்டதில்லை!
’போ வென்று ஒருவரையும்
புழுங்கிநான் சொன்னதில்லை!
‘சீ’என்று சொல்லாமல்;
சினம்கொண்டு தள்ளாமல் -

அகம் கொண்டு பார்க்கின்றேன்:
அறிவுடைய யாரையும்நான்
இகழாமல் சேர்க்கின்றேன்;
இம்முகநூல் கூட்டத்தைத்
தகவுடன்தான் நினைக்கின்றேன்;
தமிழ் உணர்வுப் பண்போட்டம்
பகர்கின்ற நண்பரெலாம்
பகையின்றி மகிழ்வதற்கும்-

நற்றமிழைக் கற்றோரும்
நாட்டு நலன் மிக்கோரும்
குற்றமிலா வாழ்வதனைக்
கும்பிட்டு நிற்போரும்;
சொற்பதங்கள் அறிவோரும்
சூதறியா நண்பர்களும்
சுற்றமெனக் கூடி யொரு
சொந்தமென ஆவதற்கும் -

இச்சுவரில் எழுதுகின்றேன்;
என் தமிழைப் பதிகின்றேன்;
அச்சமிலாக் கருத்துக்கள்;
ஆணவம் போல் தெரியுமெனில்
கொச்சைமிகும்  பதிவுகளைக்
கொண்டிருப்போர் நட்பினையே
எச்சம் எனக் கொண்டு
ஏற்பதுதான் நல்லதென்பேன்!

இவண்-
கிருஷ்ணன்பாலா
20.07.2013

வாழி,நீ வாலி!

 

ஞானம் மிகும் கவிஞனுக்கு
நண்பரெலாம் விடை கொடுத்தார்;
போனவனின் புது நடையும்
பொய்யில்லாத் தமிழ்ப் பாட்டும்
வானவருக்கு விருந் தென்று வந்துரைத்த மழை நடுவே-
ஆனவரை கவிஞரெலாம்
அவரவர்தம் விழி துடைத்தார்!

வாலிக்கு முன்னாலே
வாலாட்ட ஆளில்லை;
வாலிக்குப் பின்னாலும்
வரிசைக்கு ஆளில்லை1
கேலிக்குச் சொல்வதற்கு
கேனைபல இருந்தாலும்
வாலிக்கு நிகராக
வைக்க ஒரு கவிஞனிலை!

இவண்-

கிருஷ்ணன்பாலா 

19.7.2013