ஞானமே வா.

என்னை இந்த உலகிடையே

இட்டவன் யார் என்பதை

முன்அறிந்து சொல்பவர்யார்?கேட்கிறேன்-அதை

மொழியும்வரை முளைப்பதில்லை ஞானம்!

ஒத்தையடிப் பாதையில்

ஒற்றைமர நிழலிலே

’நத்தி நின்றால் போதும்’ என்று யாரும் - நின்று 

நம்புவதால் வருவதில்லை ஞானம்!

பத்தினியாய் இருப்பவள்தன்

பதியினோடு வாழ்ந்திடில்

எத்தனைதான் சுகம் இருந்த போதிலும் - அதில்

எட்டிவந்து சேர்வதில்லை ஞானம்!

வெட்டுப்பட்ட புண்ணிலும்

விம்மி நிற்கும் சதையிலும்

கட்டுப்பட்டுப் போகும் இந்தக் காயம் - அது

கசக்கும்வரை காண்பதில்லை ஞானம்!

கட்டளையை இட்டு உனைக்

கட்டிப் போடும் ஆசைகள்

சுட்ட பின்னர் தெரிந்திருக்கும் பாடம் - அதன்

சுவை மறந்தால் சுடுவதில்லை ஞானம்!

பட்டணத்து வாழ்க்கையில்

பட்டினத்தார் பார்வையில்

ஒட்டிக் கொண்டு இருப்பதில்லை யாரும் -அந்த

உறவுகளில் தெரிவதில்லை ஞானம்!

காதல் என்று காமத்தை

ஓதி நின்று பேசினால்

நீதி என்று ஆவதில்லை, பாரும்! - அந்த

நெஞ்சத்திலே நெகிழ்வதில்லை ஞானம்!

அப்பனோடு அம்மையை

அப்பி வைத்த காமத்தைத்

தப்பி வந்து பார்ப்பவர்க்கே தோணும் -அது

தழைக்கும்வரை முளைப்பதில்லை ஞானம்!

                                          

ஞானம் பெற்ற புத்தனும்

ஞானம் அற்ற பித்தனும்

ஞானியர்க்கு ஒன்றுதானே ஆகணும்? - இதை

அறிந்திடாமல் புரிவதில்லை ஞானம்! 

தேடும்,

கிருஷ்ணன்பாலா

24.3.2012

மகா லட்சுமிக்கு வாழ்த்து!

தந்தை முத்துக்குமரன் - குழந்தை மகாலட்சுமி - தாய் ஷாலினி
புகைப் படம் : சரவணன்                         

கூடுகட்டி வாழ்ந்த வாழ்வு குலைந்தவிட்ட போதிலும்

கூடுகின்ற நட்பினோடு குறையில்லாமல் நடக்கிறேன்;

தேடிவந்த சொந்தம் நூறு;திசைகள்தோறும் இருப்பினும்,

தெய்வமனம் திகழும் அன்பைச் சிலரிடத்தில் காண்கிறேன்!

கேடுகெட்ட உறவினோடு கீர்த்தி குன்றி வாழ்வதைக்

கிழித்தெறிந்து போட்டுவிட்டுத் தெருவழியே நடந்தவன்;

நாடுகின்ற பாதை எங்கும் வேடமிட்ட விலங்குகள்;

நானறிந்து விட்டொழித்துத் தனி வழியில் கடந்தவன்!

குன்றுபோல உயர்ந்து நின்று கோபுரமாய் வாழ்வதைக்

கொன்றுவிட்டு குப்பை மேட்டில் ‘நன்று’ என்று வாழ்வதும்;

நன்றிகொன்று தின்றுயிர்த்து நாய்களையே வளர்ப்பதும்

நாட்டிலிங்கு கண்டு நானும் அனுபவித்துச் சொல்கிறேன்:

எவரிடத்தும் உறவு இன்றி;பகையும் இன்றி வாழ்வதை

இதயம் வைத்து என்வழியில் தனிமையோடு நடந்தவன்;

தவற விட்ட அன்பு,பாசம் அத்தனையும் ஒன்றெனத்

தாங்கி வந்து ஒட்டிக் கொண்ட தத்தை மகாலட்சுமி

முத்துக்குமரன்-ஷாலினிக்கு முகிழ்த்து.அறிவுச் செல்வமாய்

முன்னிருந்து எனது அன்பை ஆளுகின்றாள்;நெகிழ்கிறேன்!

வித்தையுள்ள பேச்சுரைத்து நெஞ்சைக் கொள்ளை கொள்பவள்;

விளைந்தஆண்டு நான்கில் வாழ்த்துக் கவிதைகூறி மகிழ்கிறேன்!

முத்துப்போல விளந்து நல்ல வைரமென்று வாழவும்

முன் எவர்க்கும் நின்றுதவி உலகை அன்பில் ஆளவும்;

சொத்து சுகம் அத்தனையும் வரவு கொண்டு காணவும்;

சொந்த பந்தம் யாவும் ’இவள் சொந்தம்’என்று கூறவும்

நீண்ட ஆயுள் நிறைந்த வாழ்வு;நிகரில்லாத கல்வியில்

நிமிர்ந்திருந்து நாட்டில் நல்ல புதல்வி என்று ஆகவும்

ஆண்டவனை வேண்டி இன்று அகம் நினைந்து வாழ்த்தினேன்;

அன்புமிக்க நண்பரெலாம் அவளை வாழ்த்த வேண்டினேன்!

வாழ்த்தும்-

கிருஷ்ணன்பாலா

21.3.2012