காதலைப் பாடுகின்றேன்!

காமத்தைப் பாடும்  மானிடர் இடையே

காதலைப் பாடுகிறேன்: ஒரு

ஜாமத்தில் நானும் பாரதியின் மொழி

சார்ந்து பாடுகிறேன்!

’காதல்;காதல்;காதல்;காதல் போயிற்

சாதல்;சாதல்;சாதல்’ என்று,

தீதறுங் காதலைச் சொன்னவன் பாரதி

தீட்டிய கவிதையைக் கேட்டவர்க்கே;

என்னருங் காதலின் மேன்மை விளங்கிடும்

இங்கதன் உண்மையைச் சொல்லுகிறேன்;

என்மனம் ஈர்த்தவள் எண்ணத்தை வார்த்தவள்

இருந்த விதம் அதைச் சொல்லுகிறேன்:

(வேறு)

கொத்தும் மலர்ச் செண்டு

கூந்தல் அலை பாய

குழையூசல் செவியில் ஆட

கொவ்வை இதழ் ஓரம்

கூட்டும் நகை ஆரம்

குறிப்பான கதைகள் கூற

புத்தம் புது நிலவு

போன்ற முகத்தில் இரு

பொய்வண்டு மேவும் விழியாள்;

பொதிகை மலைச் சாரல்

புகுந்த இளங் காற்றை

பொய்யாக்கி நகரும் இடையாள்

காமம் அரும்பாத காதற் கரும்பாக

காமன் கணை தொடுத்த தேனோ?;ஒரு

ஜாமம் முழுதாக பாவம், இவன்பாடு

ஜனனம் இதற்காகத் தானோ?

கொள்ளை இடுகின்ற

கள்ளப் பார்வை தனை

மெள்ள விரிக்கின்ற பாவை;

கொஞ்சும் மொழி கூட்டி

கொள்ளைத் தமிழ் காட்டி

நெஞ்சம் புகுந்தசீ மாட்டி;

பள்ளம் மேடுகளைப்

பார்த்து நடந்தவனின்

உள்ளம் மெழுகாகும் வண்ணம்

பாச வலை வீச்சில்

பண்பு மொழிப் பேச்சில்

பற்றிக் கொண்டதவள் எண்ணம்!

காமம் அரும்பாத காதற் கரும்பாக

காமன் கணை தொடுத்த தேனோ?;ஒரு

ஜாமம் முழுதாக பாவம், இவன்பாடு

ஜனனம் இதற்காகத் தானோ?

காதல் எதுவென்று

காணும் அறிவின்றிக்

காமம் வழிகின்ற பருவம்;

கடந்து முடிந்தவனின்

கனிந்த மனம் புகுந்து

கவிதை படிக்கின்ற வித்தை;

ஓதும் பைங் கிளியின்

ஓசை கேட்ட மனம்

உணர்விலின்று ஒரு கர்வம்; அது

உலக மானுடர் தம்

உண்மைக் காதல் நிலை

உரைத்த பாரதியி னாலே.!

(வேறு)

”காதலினால் மானுடர்க்குக் கலவி உண்டாம்;

கலவியினால் காதலுக்கு  இன்பம் உண்டாம்;

ஆதலினால் மானுடரே காதல் செய்வீர்’” என

அவன் மொழியைப் படித்ததனால் காதலுற்றேன்;

கண் விழித்தேன்;பாரதியின் கனவுரைத்தேன்

கருத்திடையே புகுந்தவளின் அழகுரைத்தேன்;

மண் பிறந்த பெருமையஎலாம் காதலினால்

மலர்கின்ற மாண்பதனைப் பொருள் உரைத்தேன்!

காதலுடன்,

கிருஷ்ணன் பாலா

20.08.2011 /01:00 am