ஸ்ரீகிருஷ்ண ஜெயந்தியில்.....

கோதையர் எல்லாம் கோபியர் ஆக;

கொஞ்சும் காளையர் கோபாலன் ஆக

ராதைகள் அவனிடம் ரகசியம் பேச

ராத்திரி பகலாய் துக்கம் தொலந்திட

குவலயம் இன்று கோகுலம் ஆகட்டும்

கோபாலனருள் எங்கும் சூழட்டும்!

வீடுகள்தோறும் நந்த கோபனின்

விந்தை மிகுந்திடும் கால்கள் பதிந்திட;

கேடுகள் யாவும் தொலைக:கண்ணனின்

கீர்த்தி மிளிர்ந்திடும்  மகிழ்வு பெருகிட

குவலயம் இன்று கோகுலம் ஆகட்டும்;

கோபாலனருள் எங்கும் சூழட்டும்!

மானிடர் இடையே மயக்கம் தெளிந்திட

மக்களும் இறையும் ஒன்றெனப் புரிந்திட

நான்,நீ என்னும் அகந்தை மறைந்திட

நலம்சொலும் கீதையின் பெருமை விளங்கிட

குவலயம் இன்று கோகுலம் ஆகட்டும்;

கோபாலனருள் எங்கும் சூழட்டும்!

இறைவன் ஒன்று;அவன்பல தோற்றம்

எண்ணற்ற உயிர்கள் அவனது மாற்றம்

உறையும் மதங்கள் நதிகளைப் போன்று:

ஓடிக் கலக்கும் கடல் அவன் தான்என-

குவலயம் இன்று கோகுலம் ஆகட்டும்;

கோபாலனருள் எங்கும் சூழட்டும்!

கண்ணன் காட்டிய வழியினில் உலகைக்

காண்பதில் கர்வம் கொள்வோர் எல்லாம்

மண்ணில் அவன்வழி வந்தோர்;இன்று

மாண்பினைக் காட்டும் கிருஷ்ண ஜெயந்தியில்

  

குவலயம் இன்று கோகுலம் ஆகட்டும்;

கோபாலனருள் எங்கும் சூழட்டும்!

இவண்-
கிருஷ்ணன்பாலா

9.8.2012