இன்று
(1.9.2010-புதன் கிழமை) ஸ்ரீ க்ருஷ்ண ஜயந்தி.பரப் பிரும்மம் ஆன கண்ணனின் கருணையை மனம் நாடி விரிகின்றது. இந்த குவலய வாழ்வில் லயம் கொண்டுள்ள ‘நான்’என்ற ஆத்மனின் உள்ளரங்க ஓசைகளை உள்ளுணர்ந்தே ஒலிக்கிறது மனம்.ஓசையின்றிக் கேட்கின்றான் கண்ணன்:
நினைத்ததை நிஜமாய்ச் செய்து,
நினைத்ததை நிஜமாய்ச் செய்து,
நிஜத்தையே நினைக்கச் செய்வாய்!
தனத்தினால் தர்மம் செய்ய,
தருமத்தைத் தனமாய்த் தருவாய்!
சினத்தினைச் சிதறச் செய்து,
சிந்தனை செழிக்க வைப்பாய்!
அனைத்தையும் அழிக்கும் ஆக்கும்
அரங்கனே,கண்ண பிரானே!
ஓதிடும் உன்முன் யாவும்
ஒளிபெறக் காட்டி;எந்தன்
தீதினை ஒழித்து,ஞானத்
தெளிவினை அருள்வாய்,இன்றே!
ஆதவன் ஒளியாய்,எங்கும்
ஆண்டிடும் பரம்பொருள் உந்தன்
பாதமே கதியென நின்றேன்;
பரமனே, கண்ண பிரானே!
ஆதவன் ஒளிபட்டொழியும்
அந்தக இருட்டைப் போல
மாதவா,உன் அருள்பட்டால்
மலைகளும் சமதரை யாகும்;
சோதனை,எனைச் செய்யாதே
சொல்கிறேன்,கேளாய்,எந்தன்
பாதையில் நீமுன் செல்க;
பார்த்தனே,கண்ண பிரானே!
துறவா தெதையும் துறந்தாற் போலத்
தொடரும் இந்தப் பொய்யேனை
மறவா தணைத்துன் மடிமீது
மகிழும் ஞானக் குரு பரனே
உறவாய் எதுவும் இல்லாமல்
உலகில் எத்தனைநாள் வைப்பாய்?;
இறவா, உந்தன் பரமபதம்
எண்ணி அழைத்தேன் ஏற்பாயே!
பற்றற் றிருந்து பர ஞானம்;
பற்றும் பற்றே பற்றென்று
கற்றும் பற்றைப் பற்றாமல்
கலங்கும் இவனைக் காண்பாயா?
முற்றும் தடுத்துன் திருநிழலில்
முகிழ்க்கும் நாளும் எந்நாளோ?
குற்றம் பெருக்கும் இவ் வாழ்வைக்
குலைத்திடவருக,பரம் பொருளே!
நோயென்று வீழ்ந்தால்;என்னை
நோக்குவார் இல்லை;நானே
நாயென்று கிடந் துழன்று
நலம்பெற வேண்டும்;பிறரைப்
போயொன்று கேட்டுப் பெற்றுப்
பொறுக்கிடும் நோக்கம் இல்லை!
தாயென்று உன்னையன்றித்
தாங்குவோர்,உண்டோ,கண்ணா?
இவண்-
கிருஷ்ணன் பாலா
கிருஷ்ணன் பாலா
01.09.2010 இரவு 8:00 மணி
No comments:
Post a Comment