கிருஷ்ணன்பாலா: புனிதனைப் போற்றுமின்! புனிதனைப் போற்றுமின்!

Sunday, December 25, 2011

புனிதனைப் போற்றுமின்! புனிதனைப் போற்றுமின்!

மனித நேயம் யாதெனக் காட்டவும்

மாக்களையெல்லாம் மக்கள் ஆக்கவும்

கனிவும் அன்பும் கருணையும் கொண்டு

கடமையை உணர்த்தி,நமைஉய் விக்கவும்

தனியொரு பிறவி எடுத்தே மண்ணில்

தானோர் மகவாய்ப் பிறந்தான்;உண்மை!

புனிதன்ஏசு அவன்தான் கண்டீர்!

போற்றி வணங்குதல் மானுடர் கடமை!

வணக்கத்துடன்,

கிருஷ்ணன்பாலா

25.12.2011

No comments:

இந்த ஏகாந்த வனத்தில்...

நண்பர்களே,
தமிழ்த் தேனீக்களே.

வணக்கம்.

‘அனுபவம்’ எனும்
குப்பைகளையே
உரமாக்கிக் கொண்டு
தளிர்ப்பவைதாம்
கவிதைகள்!

இவற்றுக்கு-

விதைகள்

எங்கிருந்து
இரைக்கப் படுகின்றன?

ஆள் நடமாட்டமே இல்லாத

அத்துவானக் காடுகள்;

பச்சை மரங்கள் அடர்ந்த
பசுமை வனமாய்
ஆனது எப்படி?

அவற்றுக்கு
விதைகளைத் தூவி-

காற்றும் மழையும்
வெயிலும் தந்து,

பசுமை வனத்தைப்
படைத்தவன், எவனோ,

அவனே
எந்தன்-
‘மனம்’ எனும்வனத்தில்
கவிதைகளுக்கான
எண்ணங்களை-
வித்துக்களாக விதைக்கின்றவன்.

இன்பமும் துன்பமும்
அவற்றுக்கான
உரங்களாகின்றன.

‘காலம்’எனும் மழை நீரால்
அவை-

துளிர்த்து வேரூன்றிக்
கவிதை மரங்களாய்க்
கனிந்து,காய்த்துப்
பூத்துக் குலுங்குகின்றன!

இன்பம் மட்டுமே
வாழ்க்கை என்றால்,
அது-
செல்வச் சீமான் வீட்டுச்
செல்லக் குழந்தை போல
ஆகிவிடும்;

விருந்தும் வேடிக்கையும்
மட்டுமே
அதன் நுகர்ச்சியாகி-
வளர்ந்தபின்
பார்த்தால்தான் புரியும்:

அனுபவமும் அறிவும்
இல்லாத சவலைக் குழந்தை
என்பது!

கவிதையின் சத்தும்
அவ்வாறே!

வெறும் இன்பத்தை மட்டுமே
துய்த்துணர்ந்த அனுபவத்தால்
எழுதப்படும் கவிதைகள்
சரக்கு இல்லாத சருகுகள்!

கால வெள்ளத்தில்
அடித்துச் செல்லப்பட்டு
எங்கோ
கரையில் ஒதுங்கிக்
காணாமற் போய் விடுகின்றன!

துன்பம்-
அனுபவிக்கும்போது
மனதைக் கலங்க வைக்கும்;

‘தனக்குத் தானே’
கதறவும் வைக்கும்!
தெளிந்தபின்தான்
தெரியும்:

‘அத்தனையும்
ஞானத்தின் விளைச்சல்’
என்று!

அறிவும் ஞானமும்
வேறு எதைக் கொண்டும்
விளைந்து விடுவதில்லை,நண்பர்களே,
அனுபவத்தைத் தவிர!

“துன்பமே அனுபவங்களின் ஆசான்”.

எனக்கு-
நிறையக் கவிதைகளை
எழுதும் தகுதிகளை-

குருநாதன்
அருளியிருக்கின்றான்!

அவற்றில்-
நீந்தி, நீந்தி
ஏகாந்தக் கரையில்
ரீங்காரமிட்டுக்
கொண்டிருக்கின்றேன்!
என்பதற்கு-

இங்கே,
எனது கவிதைகளே
கட்டியம் கூறும்!

எண்ணங்களைச்
சாறு பிழிந்து
இலக்கிய மலர்கள்
பூத்துக் குலுங்கிட-

வண்ணமயமான
வார்த்தைகளில்
வளமான கருத்துக்களோடு
வடித்துத் தருகின்றேன்,கவிதைகளை!

வாருங்கள்:
இலக்கியத் தேனீக்கள்
மட்டுமே
உலாவிடக் கூடிய
ஏகாந்த வனம் இது!

அன்புடன்,
கிருஷ்ணன்பாலா

16.10.2010

krishnanbalaa@gmail.com

மற்றும்
http://ulagathamizharmaiyam.blogspot.com