விருந்தும் மருந்தும்!

கோணல்மதி கொண்டுலகில்

       குறுக்குவழி தேடிடுவோர்;
                 கூட்டதிடை மாட்டிக் கொண்ட மனது;
                கூறுகிறேன் உண்மை; அது எனது!

பூணுவது புலி வேஷம்;

       பொங்குவது ஆவேஷம்;

            புரிந்து கொள்ளும் அறிவுடையோர் கணக்கு;

            போடுகிறேன்;அதிகமில்லை எனக்கு!

நாணலதைப் போல் மனதை

         நான் வளைத்துக் கொள்வதில்லை;

                நச்சுமனப் பேர்வழிகள் கூட்டம்;

                நான் நிமிர எழுதுவதால் வாட்டம்!

மாணவனைப் போலிருந்து

        மற்றவர்க்குக் கற்றுத் தரும்

                 மடமையதில் உழலுகின்ற ஆளை;

                 மண்டியிட வைப்பதுஎன் வேலை!

வள்ளுவனும் பாரதியும்

       வார்த்தெடுத்த வார்த்தைகளைக்

                  உள்ளமிதில் விதைத்தவனின் எழுத்து;

                 உலகளவில் சொல்லுகின்ற கருத்து!

உள்ளபடி சொல்லுகின்றேன்;

        உண்மையைத்தான் வெல்லுகிறேன்!

                 ஊக்கமுடன் சொல்லுவதைக் கேளீர்;

                      உணர்பவர்கள்தாம் எனக்குக் கேளிர்!

தெள்ளுதமிழ்ப் பண்புகளை

       தெளிவாக எடுத்துரைக்கத்

                 தீந்தமிழின் வார்ப்புக்களைத் தேடி;நான்

                           தீட்டியது ஞானம் ஒரு கோடி!

கள்ள மனம் பெற்றவரும்

       கயமைக் குணம் கற்றவரும்

                   கட்டாயம் என் எழுத்தைக் கண்டு

              கலங்குகின்றார் கவலைகளில் நின்று!

ஆனவரை நானவரை

       அடையாளம் கண்டு கொண்டு

                   அவர்திருந்த நான் எழுதும் பாட்டை;

             ஆணவம்போல் சொல்பவர்கள் ஓட்டை!

மானுடன்நான் என்றாலும்

         மற்றவர்போல் இல்லாமல்

                   மானமிகும் நெஞ்சுரத்தால் நின்று;பொய்

                      மாய்ந்திருக்க எழுதுகிறேன் இன்று!

மானமின்றி நாணமின்றி

         மாக்களென வாழுகின்றோர்

                    மனந் திருந்த வேண்டுமெனும் நோக்கம்;அது

                    மாகவிஞன் பாரதியின் தாக்கம்!

பூனைகளும் யானைகளும்

       புரிந்து கொண்டால் என் எழுத்து

                  புதுப் படையல்போல் விளங்கும் விருந்து;

                     புல்லருக்கோ வாய்கசக்கும் மருந்து!

இவண்-

கிருஷ்ணன்பாலா

14.10.2011