இது கனவல்ல;நிஜம்!

கனவுலகில் நான் புகுந்து
கற்பனையை வளர்த்திருந்து
நனவுலகாய் நம்புகிறேன்;பாரீர்;அதில்
நான்படைக்கும் கவிதைகளைக் காணீர்!

கற்றவர்கள் அருகிருக்க;

கல்லாதோர் கல்லெறிய;
மற்றவர்கள் வேடிக்கை பார்க்கிறார்;அந்த
மாயையிலும் மலைஎனவே நிமிர்கிறேன்!.

என் விருந்தை ஏப்பமிட்டு
இலைகளையும் நக்கி விட்டு
இன்னும் சோறுஇல்லையென்று சொல்கிறார்;
இந்த ஏழைகட்கு என்னசெய்ய வேண்டுமாம்?

சுற்றியுள்ளோர் ஆயிரமாய்ச்

சூழ்ந்திருந்த போதிலும்;என்
சுற்றத்தினர் எங்கு என்று தேடினேன்;அட
சுற்றுமுற்றும் யாருமில்லை;விழிக்கிறேன்!

முகநூலில் அகம் புதைத்து

முழுமையாக இருப்பவர்க்கு
பகருகின்றேன்;என் கனவை நன்றுதான்;
பாவம், நானும் நீங்களுமே ஒன்றுதான்!

இவண்-

கிருஷ்ணன்பாலா

15.10.2011